ஆருத்ரா - ஆன்மீக மாத இதழ் வெளியீட்டு விழா !

தமிழ்ச் சமூகத்தின் சொல் வியாதி பற்றி விளக்குகிறார் சுந்தர ராமசாமி

‘ரெட்டாரிக்’ என்ற ஆங்கிலச் சொல் சில நாட்களாக அடிக்கடி மனதில் வந்து கொண்டிருக்கிறது. மூல அர்த்தத்திலிருந்து அந்தச் சொல் விலகிப் போய்க்கொண்டிருப்பதான தோற்றம் ஏற்பட்டுக் கொண்டிருக்கிறது. இன்றைய ஆங்கில விமர்சனக் கட்டுரைகள் ஒரு சிலவற்றில் அச்சொல் எதிர்மறையாக அல்லாமல் சாதகமாகக்கூடப் பயன்படுத்தப்படுகிறதோ என்ற எண்ணம் ஏற்படுகிறது. இன்று தமிழ் வாழ்வு ஒரு அவலப் புள்ளியில் வந்து நிற்கிறது. சிக்கலான, மொழிவழிப்படுத்தக் கடினமான புள்ளி அது. ஆனால் தமிழ் வாழ்வில் மையச் சுழற்சி சார்ந்த புரிதல்- பல்வேறு கோணங்களிலிருந்து பெறும் பார்வைகளின் தொகுப்பாக- வெளிப்படாத வரையிலும் இந்திய வாழ்க்கையையோ, உலக வாழ்க்கையையோ, வியப்பூட்டும் பிரபஞ்ச விரிவு பற்றிய அறிவையோ நாம் சரிவரப் புரிந்துகொள்ள முடியும் என்று தோன்றவில்லை. தமிழ் சார்ந்த வாழ்வின் உள்ளார்ந்த விதைகள் என்ன? இதைப் பற்றி நமக்கு இன்று தெளிவு இல்லை. இந்த விதைகளை நாம் ஊடுருவிப் பார்க்க முடியாதபடி எவ்வளவோ மாய்மாலங்கள், பொய்த்திரைகள், கபட வேடங்கள், தந்திரங்கள், நீட்சியான ஏற்பாடுகள் நம்மைச் சுற்றிக் கண்ணி வலைகளாக விரிந்து வாழ்வில் ஒரு பகுதியாக இறுகிக் கிடக்கின்றன. தனி நபர்களின் செயல்பாடுகளில் இருக்கும் ஊழல்களை ஏதேனும் ஒரு காரணத்தை முன்னிட்டு அம்பலப்படுத்த இயலவில்லை என்றால் சமூகச் சரிவுகளை எப்படி விளங்க வைக்கப் போகிறோம் என்பதும் தெரியவில்லை. ஊழலை அம்பலப்படுத்த முயலும்போது எனக்குச் சாதகமாக நிற்கும் ஒரு சூழலை ஏன் நான் கெடுத்துக்கொள்ள வேண்டும் என்ற எண்ணம் ஒவ்வொருவருக்கும், முக்கியமாக எழுத்தாளர்களுக்கு வலுப்பட்டுவிட்ட ஒரு சமூகத்தில் வாழ்க்கையை மேலும் கீழ்நிலைக்குத் தள்ளும் ஏற்பாடுகள்தான் வெற்றிகரமாகச் செயல்பட்டுக் கொண்டிருக்கும்.

ரெட்டாரிக் என்ற சொல், தமிழ் வாழ்வு சம்பந்தப்பட்ட வரையில் மிக முக்கியமான சொல். இந்தச் சொல்லின் மூலப் பொருளைச் சுட்டும் ஒற்றைத் தமிழ்ச் சொல் எனக்குத் தெரியவில்லை. ஒற்றைத் தமிழ்ச் சொல் இருக்கும் என்றால்-இப்போதைக்கு அது தெரியாமல் இருப்பது நல்லதுதான். ஏனென்றால் இந்தச் சொல்லுக்கு என்னென்ன அர்த்த விரிவுகள் இருக்கின்றனவோ எல்லாவற்றுடன் ஏதோ ஒரு விதத்தில் உறவு கொண்டு நிற்கிறது நம் வாழ்க்கை. இருக்கும் தொடர்பை மேலும் ஆழப்படுத்திக்கொண்டும் வருகிறது. என்னென்ன அர்த்தச் சாயல்கள் இந்தச் சொல்லுக்கு இருக்கின்றன என்று பார்க்கலாம். ஆவேசமாகப் பேசப்படும் பேச்சு. ஆவேசமாக எழுதப்படும் எழுத்து. மிகை, சாரமற்ற சத்தம், தேவையற்ற நாடகப் பாங்கு, ஆடம்பரம், அந்த நிமிச வெற்றிக்கான சாகசம், எதிர்பார்ப்பின்றியே கேள்விகளை எழுப்புதல், சவடால்தனம் இவ்வாறு பல பல அர்த்தச் சாயல்களை எந்த விகற்பமும் இல்லாமல் இந்த ரெட்டாரிக் என்ற சொல் தன் பக்கம் இழுத்துக் கொள்கிறது.

தமிழ் அரசியல், நாடகம், புனைகதைகள், இதழியல், திரைப்படம், மேடைப் பேச்சு, சமயத் தலைவர்களின் கூத்தடிப்பு, ஜாதி, மதத்துவேசங்கள், மேடைப் பேச்சுக்கு உரியவையாக மேடையிலோ அல்லது மனமேடையிலோ உருவாகும் கவிதைகள், கைதட்டலுக்காக உற்பத்தி செய்யப்படும் கவிதை வரிகள், உள்ளாழமற்ற ஆனால் கம்பீரமாக எழுப்பப்படும் அறைகூவல்கள் என்ற பல்வேறுபட்ட நிகழ்வுகள் இந்தச் சொல்லிலிருந்து நமக்கு நினைவுக்கு வரும்போது தமிழ் வாழ்வின் மையத்துக்குள் ஊடுருவ இந்தச் சொல் உதவுவதை நாம் உணர முடியும். இதுபோல் பல சொற்கள் நமக்குத் தேவையாக இருக்கின்றன. பல சொற்கள், பல வாக்கியங்கள், பல சிந்தனைகள், பல புத்தகங்கள், நடைமுறை அனுபவங்கள், கள ஆராய்ச்சிகள் என்று ஊடுருவிச் செல்லும் ஆயுதங்கள் பல தேவையாக இருக்கின்றன. இந்தச் சொல்லுக்குரிய எல்லா அர்த்தங்களையும் ஏககாலத்தில் சுமந்து கொண்டு போவது சிரமம் என்பதால் பொருளின் எல்லாச் சாயல்களையும் உள்ளடக்கி போலி நாடகப் பாங்கு என்ற பொருளை நாம் இப்போதைக்குத் தக்க வைத்துக்கொள்ளலாம்.

உண்மையைத் தேடும் மனம்

போலி நாடகப் பாங்கை முற்றாகத் தவிர்த்த வாழ்க்கை என்பதே இல்லை. முற்றாகத் தவிர்த்த கவிதை என்பதும் இல்லை. கவிதை உண்மையின் தளத்தில் ஊடுருவி நெடுந்தூரம் போகும்போது கவிஞனின் ஆத்மார்த்தமான குரல் சந்தேகத்துக்கு இடமின்றி நம் அனுபவ இழையில் ஒன்றிக்கொள்ளும்போது அலைபோல் பட்டென்று எழும்பி வரும் ரெட்டாரிக் ‘மிகையான நாடகப் பாங்கு’ உண்மையின் தொனி கொண்டு நமக்கு மிகுந்த மன எழுச்சியை ஏற்படுத்துகிறது. இந்த மன எழுச்சியை ஏற்படுத்துவதற்குக் காரணம் கவிஞனிடமிருந்து தொடர்ந்து வெளிப்படும் ஆத்மார்த்தமான குரலும் அந்தக் குரல் அவனுக்கு அடித்தளமாக நிற்பதும் அந்தத் தளத்தில் அவன் தன் நெடும் பயணத்தைத் தொடர்வதும் ஆகும். இந்த ஆத்மார்த்தமான அடித்தளப் பயணம் இல்லையென்றால் இந்த ரெட்டாரிக் உண்மையைத் தேடும் மனதில் எந்த ஆவேசத்தையும் எழுப்பாது. அதன் போலித்தனம் பட்டென்று வெளிப்பட்டுத் துல்லிய மனங்களில் பரிகாசச் சிரிப்பை உருவாக்கும்.

‘இரந்தும் உயிர்வாழ்தல் வேண்டின் பரந்து

கெடுக உலகியற்றி யான்’ என்ற குறளுக்கும்

‘தனியருவனுக்கு உணவில்லையெனில்

ஜகத்தினை அழித்திடுவோம்’ என்ற கவிதை வரிகளுக்கும் பொருள் ஒற்றுமையோடு இரண்டாயிரம் ஆண்டு நீட்சியின் இரு எல்லைகள் காணக் கிடைப்பது மிகையான நாடகப் பாங்குக்கும் கவிதைக்குமான உறவை நியாயப்படுத்துகிறது. வள்ளுவனிலும் சரி பாரதியிலும் சரி ரெட்டாரிக்கை நாம் ஏற்றுக் கொள்கிறோம். சந்தேகத்துக்கு இடமின்றி அவர்களுடைய கவித்துவப் பயணம் ஆத்மார்த்தமான தளத்தில் நிகழ்ந்திருப்பதுதான் இதற்குக் காரணம். உலகக் கவிஞர்கள் மத்தியில் இந்த நாடகப் பாங்குக்கு வலுவான பெருமையை ஏற்படுத்தித் தந்தவர் என்று வால்ட் விட்மனைச் சொல்லலாம். அவர் தமிழ்க் கவிஞர்களையும் வெகுவாகக் கவர்ந்தவர் என்பது நாம் நினைவில் கொள்ள வேண்டிய ஒரு செய்தியாகும்.

நாணயங்களின் நம்பகத் தன்மையிலிருந்துதான் போலி நாணயங்கள் உருவாகின்றன. நல்ல நோட்டுகள் இருப்பதால்தான் கள்ள நோட்டுகளைப் புழக்கத்தில் விட முடிகிறது. கள்ள நோட்டுகள் நீக்கமற நிறைந்துவிட்டால் அவற்றின் சுவாதீனம் செல்லுபடியாகிவிடும். தமிழில் ரெட்டாரிக் என்ற சொல்லின் சகல சாயல்களும் ஜனரஞ்சகக் கவிதையின் அங்கங்களாக இருக்கின்றன. இப்போது மிகையான நாடகப் பாங்கே கவிதை என்றாகி விட்டது. ரெட்டாரிகே கவிதை என்றாகிவிட்டது. பெரும் வரவேற்புக்கு உட்படும் வெற்றிகரமான, புகழ் வாய்ந்த கவிஞர்களின் செயல்பாட்டுத் தளம் இதுதான். இவர்களுடைய செயல்பாட்டுத் தளம் தமிழ் வாழ்வுக்குரிய அவலத்தின் குறியீடாக இருக்கிறது. தமிழ் வாழ்க்கையில் காணக்கிடைக்கும் சரிவுகளும் தாழ்வுகளும் அவற்றின் அருவருக்கத்தகுந்த தோற்றத்தை மறைத்துக்கொண்டு, அவர்களுடைய கவிதைகளில் வரிகளாக உருவாகின்றன. வாழ்க்கை வெளிப்படுத்தும் நிகழ்வுகளை ஆராய்ந்தோ அவற்றின் பரிமாணங்களைத் தியானித்தோ அவர்கள் எந்த நிலைப்பாடுகளையும் எடுப்பதில்லை. அவர்களுடைய நிலைப்பாடுகள் நிலையானவை; தீர்மானிக்கப்பட்டவை. ஒரு எலும்புத்துண்டு போல் இறுக்கமானவை அவை. பாடுபொருள் சார்ந்து அந்த எலும்புத் துண்டின்மீது சபைக்கேற்ற சதையைப் பொதிந்து தரவேண்டும். இந்த வேலை மட்டுமே அவர்களுக்கு உள்ளது. அவர்களுடைய வரிகளை அவர்களோ, ஒலிபெருக்கி வழியாகச் செவிப்பறை அதிர்வுகள் வழியாக உடலில் உஷ்ணம் ஏற்றிக்கொள்பவர்களோ நம்புவதில்லை. யாருமே நம்பாத வரிகளை எல்லோருமே சேர்ந்து ரசிக்கிறார்கள். இந்த ரசனையை மேடைப் பேச்சு, திரைப்படம், சமயச் சொற்பொழிவு, தொலைக்காட்சி நிகழ்வுகள் போன்றவற்றை எதிர்கொள்ளும் எல்லாச் சபைகளிலும் நாம் பார்க்கலாம்.

செயல்பாடும் அதன் தாக்கமும்

ஒரு தையல் மிஷின் ஓடிக் கொண்டிருக்கிறது. ஊசி சொருகப்பட்டிருக்கிறது; ஆனால் நூல் கோர்க்கப் படவில்லை. அப்படியென்றால் அந்தத் தையல் மிஷின் வேலை செய்கிறதா? வேலை செய்யவில்லையா? தையல் மிஷினுக்குரிய சத்தம் அதில் இருக்கிறது. கால்கள் தொடர்ந்து பெடல் செய்துகொண்டிருப்பதால் உழைப்பு வெளியேறிக்கொண்டுதான் இருக்கிறது. துணி நகர்த்தப்பட்டுக் கொண்டிருக்கிறது. வெளியே வழியும் துணி, பெடல் செய்யும் கால்களை மறைக்கிறது. ஆனால் தையல் என்ற ஆதாரமான காரியம் நடைபெறவில்லை. இன்றைய ஜனரஞ்சகக் கவிஞர்களுடைய கவிதைகள் தமிழ் வாழ்க்கையைப் பாதித்திருக்கிறதா - பாதிப் பது போன்ற தோற்றம் இருக்கிறதா என்று கேட்டால், தோற்றம் இருக்கிறது என்றுதான் சொல்ல வேண்டும். வலிமையாக இருக்கிறது என்றுகூடச் சொல்லலாம். பரவலாகக் கவனத்திற்கு வந்துவிட்ட ஒன்று மிகுந்த பாதிப்பை நிகழ்த்துவதான தோற்றத்தை உருவாக்கிக் கொண்டிருக்கிறது. அச்சில் ஒருவடைய பெயர் எப்போதும் வந்துகொண்டியிருந்தால் பேச்சில் ஒருவடைய பெயர் அடிபட்டால் அவர் ஆழமான, ஆக்கபூர்வமான காரியத்தைச் செய்து கொண்டிருக்கிறார் என்ற தோற்றம் ஏற்படுகிறது. இந்தத் தோற்றம் எல்லாமே பொய்.

எந்தக் கவிஞனும் வாழ்க்கையை நேரடியாகப் பாதிப்பதில்லை. அது சாத்தியமுமில்லை. அவன் கவிதைகள் மூலம் உடனடியாக எதுவும் நிகழ்வதுமில்லை. கவிஞன் ஒரு பாதிப்பை நிகழ்த்த வேண்டும் என்றால் அது எங்கு நிகழ்கிறது? வானத்திலா? கடலிலா? மண்ணிலா? காற்றிலா? எங்கு நிகழ்கிறது அந்தப் பாதிப்பு? தனி அறையில் ஒரு காகிதத்தில் சில எழுத்துகளை வரிசைப்படுத்துவதன் மூலம் ஒரு சமூகப் பாதிப்பை நிகழ்த்த முடியும் என்றால் எங்கு நிகழ்கிறது அந்தக் காரியம். கவிஞனுடைய செயல்முறை வித்தியாசமானது. பாதிப்பு நிகழும் முறை வித்தியாசமானது. அவன் காலத்தை முறித்து எதுவும் செய்வதில்லை. வாழ்க்கையை ஸ்தம்பிக்கச் செய்து புதிய தளத்தில் அதைத் திருப்பிவிட அவனிடம் பேராற்றல் எதுவும் இல்லை. மிகமிகச் சாவகாசமாக நம் புலன்களால் உணர முடியாதபடி கண்டறிவதுகூடச் சாத்தியமில்லாதபடி, அவன் காலத்துக்குள் ஊடுருவிக் கொண்டிருக்கிறான். காலத்துக்குள் ஊடுருவது எப்படிச் சாத்தியமாகிறது? காலம் எங்கே இருக்கிறது? ஒரு கவிஞனாக வாழ்க்கையைப் பாதிக்க வேண்டும் என்றால் நான் என்ன செய்ய வேண்டும். கவிஞனுக்கு ஒரு சாத்தியக்கூறுதான் இருக்கிறது. அவன் மொழியுடன் விசேஷமான உறவு கொண்டிருக்கிறான். விசேஷம் என்று சொல்லலாம். வித்தியாசமான, ரகசியமான, நுட்பமான, மாந்த்ரீக அம்சம் கொண்ட உறவு கொண்டிருக்கிறான் என்றெல்லாம் சொல்லாம். ஒன்று தெளிவு. மொழியுடன் சகஜ மனிதன் கொண்டிருக்கும் உறவல்ல அது. சாதாரண மனிதன் கொண்டிருக்கும் உறவல்ல அது. மொழியைப் பாதிப்பதன் மூலம்தான் கவிஞன் சமூகத்தைப் பாதிக்கிறான். நித்திய வாழ்வில் எண்ணற்ற மக்கள் எண்ணற்ற காரியங்களுக்காகச் சொற்களைச் சிதறிக்கொண்டே இருக்கிறார்கள். இந்தச் சொற்சிதறலைச் சார்ந்து நிற்கிறது மனித வாழ்க்கை. இந்தச் சொற்சிதறலைச் சார்ந்து நிற்கிறது மனித உறவு. பயன்படுத்தப்பட்டு, பயன்படுத்தப்பட்டதன் மூலம் தெளிவு பெற்றுவிட்ட சொற்களின் ஆற்றலை நம்பி வாழ்க்கை ஓடிக்கொண்டிருக்கிறது. சாத்தியமான காரியங்களுக்குள் மொழி சுற்றிச் சுழன்றுகொண்டு வரும்போது அதிகப் பலன்களை மொழி ஈட்டித் தரும் நேரத்திலேயே மொழியின் எல்லைகளும் இறுகுகின்றன. அர்த்தம் இறுகுகிறது. சொற்கள் கூழாங்கற்களாக மாறிவிடுகின்றன. கூழாங்கற்களாக மாறிவிட்ட சொற்கள் மீது அரசியல்வாதிகளுக்கு இருக்கும் காதல், ஜனரஞ்சகக் கவிஞனுக்கு இருக்கக்கூடிய காதல் கொஞ்ச நஞ்சம் அல்ல. மேடையிலும், காகிதத்தின் மீதும் அந்தக் கூழாங்கற்களை வீசிவீசிப் பிடிப்பதில் படைப்புமனம் அற்ற பழக்கவாதிகளுக்கு எல்லையற்ற மகிழ்ச்சி ஏற்படுகிறது. கூழாங்கற்கள் போல் இறுகும் சொற்களை மீண்டும் அர்த்தச் செறிவுக்குள் தள்ளி அதை விம்மும்படி செய்பவன் கவிஞன். வார்த்தைகள் ஒன்றுக்கொன்று கொள்ளும் விநோத உறவுகளில் இந்த விம்மல்கள் நிகழுகின்றன. இந்த விநோத உறவு நிகழ வேண்டுமென்றால் மிகுந்த படைப்பாற்றல் வேண்டும்.

படைப்பாற்றல் என்பது ஒரு சக்தியின் உருவம். அந்த ஆற்றலை நீங்கள் கீறிப்பார்த்தால் அதில் சிந்தனை சார்ந்த ஒரு நுட்பம் துடித்துக் கொண்டிருப்பதை உணரலாம். மாறுபட்ட கோலங்களுக்கு அடிப்படையாக நிற்கும் ஏதோ ஒன்றைக் கவிதை எப்போதும் தேடிச் செல்ல முனைகிறது. நாம் விரும்பிப் படித்த பல கவிதைகளில் ஒரு சில கவிதைகள் நம்மை வெகுவாகக் கவர்கின்றன. மிக அதிகமாக நம்மைக் கவரும் கவிதைகளுக்குள் தென்படும் பொதுத்தன்மை என்ன என்று நாம் யோசிக்க முற்படுகிறோம். அந்தப் பொதுத்தன்மையை வரையறுப்பது மிகக் கடினமாக இருக்கிறது. சிறப்பான ஒவ்வொரு புதுக்கவிதையும் அந்தப் பொதுத்தன்மையை ஏதோ ஒருவிதத்தில் குலைத்து, பொதுத்தன்மை சார்ந்த நம் தீர்மானத்தையும் குலைத்துவிடுகிறது. சிறந்த கவிதைகளுக்குப் பொதுவாக நிற்கும் நியதிகளை வரையறுக்க முயல்கிறோம்.

(சுந்தர ராமசாமி 1.5.2000 அன்று எழுதிய இந்தக் கட்டுரை இதுவரை பிரசுரம் செய்யப்படவில்லை. இன்று (மே, 30) அவரது பிறந்த நாளை ஒட்டி இக்கட்டுரை இங்கு பிரசுரம் செய்யப்படுகிறது.)

தி இந்து: சுந்தர ராமசாமி, 

தமிழ்வழியில் பொறியியல் பட்டம் பெற்ற முதல் குழுவினர்

தமிழ் வழியில் இன்ஜினீயரிங் படிப்பு: இறுதியாண்டில் முதல் பேட்ச் மாணவர்கள்

தமிழகத்தில் 2010-ம் ஆண்டு முதன்முதலாக தமிழ்வழி இன்ஜினீயரிங் பாடத்திட்டங்கள் அறிமுகப்படுத்தப்பட்டன. அண்ணா பல்கலைக்கழகத்தில் அறிமுகப்படுத்தப்பட்ட இந்தப் பாடத்திட்டம், தமிழகத்தில் உள்ள அனைத்து அண்ணா பல்கலைக்கழக கல்லூரிகளிலும் நடத்தப்பட்டு வருகிறது. இந்தப் பாடத்திட்டத்தில் சிவில் மற்றும் மெக்கானிக்கல் துறைகள் இயங்கி வருகின்றன.

தமிழ் வழியில் பயிலும் மாணவர்களுக்கு அரசு வேலைவாய்ப்பில் 20 சதவீத இட ஒதுக்கீடு வழங்கப்படும் என்று அப்போதைய திமுக அரசு அரசாணை பிறப்பித்தது. இதனால் மாணவர்களும் தமிழ்வழிக் கல்வியை விரும்பி எடுத்தனர்.

தற்போது தமிழகம் முழுவதும் ஆயிரக்கணக்கான மாணவர்கள் தமிழ்வழியில் இன்ஜினீயரிங் படித்து வருகின்றனர். 2010-ம் ஆண்டு சேர்ந்த முதல் பேட்ச் மாணவர்கள், இப்போது இறுதியாண்டை எட்டியுள்ளனர். தமிழ்வழியில் படித்த தங்களுக்கு அரசு வேலைவாய்ப்பு வழங்க வேண்டும் என அவர்கள் கோரிக்கை விடுத்துள்ளனர்.

இதுகுறித்து இறுதியாண்டு மாணவர் ஒருவர் கூறியதாவது:

எங்கள் பல்கலைக்கழக வளாகத்தில் கடந்த ஆகஸ்ட் மாதம் முதலே வளாக நேர்முகத் தேர்வுகள் நடத்தப்பட்டு வருகின்றன. ஆங்கில வழியில் படித்த மாணவர்களுக்குத்தான் அதில் முன்னுரிமை வழங்கப்படுகிறது. தமிழ்வழி மாணவர்களுக்கு சொற்பமான அளவிலேயே வளாக நேர்முகத் தேர்வுகள் நடத்தப்படுகிறது. எங்களுக்கு உரிய வேலைவாய்ப்பை வழங்க அரசும் பல்கலைக்கழமும் ஏற்பாடு செய்ய வேண்டும்.

இவ்வாறு அவர் கூறினார்.

அண்ணா பல்கலைக்கழகத்தின் வளாக நேர்முகத்தேர்வு அலுவலர் தியாகராஜன் கூறியதாவது:

தமிழ்வழி மாணவர்களுக்கு வேலை கிடைக்காததுபோல் ஒரு மாயை உள்ளது.

சென்னை அண்ணா பல்கலைக்கழக வளாகத்தில் ஒரு தமிழ்வழி மாணவியே அதிகமான சம்பளத்தில் வேலைக்கு தேர்வாகியிருக்கிறார். தமிழ்வழியில் மெக்கானிக்கல் படிக்கும் எஸ்.சண்முகப்பிரியா என்ற அந்த மாணவியை மஹேந்திரா & மஹேந்திரா நிறுவனம், ஆண்டுக்கு ரூ.5.6 லட்சம் சம்பளத்துக்கு தேர்வு செய்துள்ளது.

மேலும் பல நிறுவனங்களுடன் பேசிக்கொண்டிருக்கிறோம், அவையும் வளாக நேர்முகத்தேர்வுக்கு வருவதாக கூறியுள்ளன. ஆங்கில வழி மாணவர்களைப் போலவே டான்செட், கேட் போன்ற நுழைவுத்தேர்வுகளை எழுதி தமிழ் வழி மாணவர்களும் மேற்படிப்பை படிக்கலாம். இவ்வாறு அவர் கூறினார். 

தி இந்து 

சுருங்கும் இரண்டாம் இதயம் : ஏன் இந்த ஏமாற்று ?

வாசகர் சந்தேகம்:

ஓரு மனிதனின் இரண்டாம் இதயம் புத்தகம். இதயத்தை இயக்கும் இதயம் (புத்தகம்). சுருங்கியும் விரிந்தும் உடல் முழுவதும் ரத்தத்தைக் கடத்துவது இதயத்தின் வேலை. ஆனால் தமிழ்ப் பதிப்புச் சூழலில் சில புத்தகங்கள் சுருங்கிக் கூட இல்லை. கழுத்தில் சுருக்கிட்டுக் கொண்டே வருகின்றன.

பாதையோரம் மரம் நட்டுச் சென்ற முன்னோர்களின் பாதையில் நடக்காவிட்டாலும் பரவாயில்லை. பாதையில் கருவேலம் முள்ளை வெட்டிப் போட்டா செல்வது?

க.நா.சு, எஸ்.எஸ்.மாரிசாமி என பல முன்னோடிகள் அரிய நூல்களைத் தமிழாக்கம் செய்துள்ளனர்.

இந்த நூல்களில் பெரும்பாலானவை தற்போது சுருக்கப்பட்டதாகவே கிடைக்கின்றன. பெரிய நூலாக இருந்தால் வாசகன் படிக்கமாட்டான் என்பதற்காக, எழுத்தாளரே சுருக்கி எழுதிய படைப்புகள் உண்டு. ஆனால் முழுமையாக மொழிபெயர்த்ததைச் சுருக்கிப் போடுவது, எந்த ஊர் நியாயம்? இது ஒருபுறம் என்றால், சுற்றுச்சூழல் தொடர்பாக வரும் பல புதிய நூல்கள் சுருக்கியே வந்துள்ளன. இது ஏன் என்றே தெரியவில்லை? இயற்கை வளங்கள் குறைந்து வருகின்றன என்பதைக் குறியீடாகக் காட்டுகிறார்களோ என்னவோ தெரியவில்லை. ஏழு கடல் தாண்டிச் செல்லும் சிந்துபாத் போல, ஒரு நல்ல புத்தகத்தைப் படிக்க, தமிழ் வாசகன் பல புத்தகங்களை வாங்கக் கூடிய நிலைக்கு தள்ளப்படுகிறான். இது சரியா? ஏன் இந்த ஏமாற்று? 

செய்தி : தினமணி  : 

தாய்மொழித் திறன் வளர்ப்போம்

அன்ன சத்திரம் ஆயிரம் கட்டுவதைவிட ஒரு ஏழைக்கு எழுத்தறிவிப்பது மேன்மையானது என்றார் மகாகவி பாரதியார். இது சாதாரண வாக்கியமல்ல. எதிர்கால சந்ததியினரின் நல்வாழ்க்கையை முன்னிறுத்தி பாரதியார் உதிர்த்த மந்திரச் சொற்கள்.

கல்வியில் தமிழகம் முதலிடம் பிடிக்க வேண்டும் என்ற நோக்கில், தமிழக அரசு 2023 தொலைநோக்குத் திட்டத்தை செயல்படுத்தி வருகிறது. கல்விக்காக மட்டும் மொத்த நிதி ஒதுக்கீட்டில் எட்டு சதவீதம் செலவிடப்படுகிறது.

சர்வதேச தரத்தில் குக்கிராம மாணவருக்கும் கல்வி கிடைக்க காணொலி கற்பித்தல் திட்டம், அனைவருக்கும் கல்வித் திட்டம், குடும்பத் தலைவரை இழந்த குழந்தைகளுக்கு ரூ.50 ஆயிரம் நிதியுதவி, விலையில்லா மடிக்கணினி, விலையில்லா பாடநூல்கள், சீருடை, உயர்கல்வி வரை கல்விக் கட்டணச் சலுகை, விலையில்லா மிதிவண்டி என முன்னோடித் திட்டங்கள் அரசால் செயல்படுத்தப்பட்டு வருகின்றன.

வறுமைக்கோட்டுக்கு கீழேயுள்ள ஒரு குடும்பத்தைச் சேர்ந்த குழந்தை கல்வி கற்பதில் எவ்வித இடையூறும் இல்லாத வகையில் திட்டங்கள் செயல்படுத்தப்படுகின்றன. தமிழகத்தில் பிறந்த எந்த ஒரு குழந்தையாக இருந்தாலும், பள்ளிக்குச் சென்று, கல்வியை முறையாகக் கற்றால் உயர்நிலையை அடைய முடியும் என்ற சூழல் இருக்கிறது.

அத்துடன், தனியார் பள்ளிகளுக்கு இணையாக அரசுப் பள்ளிகளிலும் கணினி வசதி, அறிவியல் ஆய்வுக்கூடங்கள், கழிப்பறை வசதிகள், குடிநீர் வசதிகளுக்கென பல கோடி ரூபாயை அரசு செலவிடுகின்றது.

பத்தாம் வகுப்பு மற்றும் பிளஸ் 2 அரசுத் தேர்வுகளில் 100 சதவீதம் தேர்ச்சி பெறத்தக்க வகையில் மாணவர்களுக்கு சிறப்புப் பயிற்சியும், ஊக்குவிப்பு நிகழ்ச்சிகளும் நடத்தப்படுகின்றன. இதற்காக மட்டும் பல கோடி ரூபாயை அரசு ஒதுக்கீடு செய்கிறது.

முன்போல இல்லாமல், பள்ளிக்கல்வித் துறை உயர் அதிகாரிகள் மாவட்ட வாரியாக ஆய்வுகளை மேற்கொண்டு வருகின்றனர். நடப்பு கல்வியாண்டில், தமிழகம் முழுவதும் நடைபெற்ற ஆய்வு முடிவில் அதிகாரிகளுக்கு கிடைத்துள்ள புள்ளி விவரங்கள் அடிப்படையில் மாநில அளவில் அரசு பள்ளிகளில் 6, 7, 8ஆம் வகுப்புகளில் பயிலும் மாணவர்களின் தமிழ் வாசிப்பு மற்றும் எழுத்துத்திறன் சராசரி 72 சதவீதம் என்ற அதிர்ச்சித் தகவல் கிடைத்துள்ளது. உலகில் மூத்த மொழி, கல்தோன்றி மண் தோன்றா காலத்து மூத்த மொழி என்றெல்லாம் பறைசாற்றும் தமிழக மக்களின் குழந்தைகளின், அதாவது பள்ளி செல்லும் குழந்தைகளின் தாய்மொழி வாசிப்புத்திறன் 72 சதவீதம் என்பதோடு நின்றுவிடவில்லை.

பெரும்பாலான மாவட்டங்களில் வீடுகளில், மாணவர்கள் நடமாடும் இடங்களில் எல்லாம் பேசப்படும் ஒரே மொழியான தமிழ்மொழிக்கு மத்தியில் வாழும் நூற்றுக்கணக்கான கிராமப்புற பள்ளிகளில் மாணவர்களின் வாசிப்புத்திறன் 20 சதவீதம் முதல் 38 சதவீதமாகவும் இருப்பது வேதனையிலும் வேதனை என்கின்றனர் தமிழ் ஆர்வலர்கள்.

அரசுப் பள்ளிகளில் சர்வதேச தரத்துக்கு மாணவர்களுக்கு கல்வி கிடைக்க பல ஆயிரம் கோடிகளை தமிழக அரசு கொட்டி வரும் சூழலில், இன்றளவும் 6, 7, 8 ஆம் வகுப்புகளில் பயிலும் மாணவர்களின் தமிழ் வாசிப்புத்திறனே மிகக் குறைவாக இருப்பதற்கு மாணவர்களை மட்டுமே குறை கூறி விடமுடியுமா?

இந்த மாணவர்களுக்கு பயிற்றுவிக்க வேண்டிய ஆசிரியர்களின் புனிதமான பணியில் மட்டுமின்றி, மாவட்ட அளவிலான கல்வித் துறை அதிகாரிகள், உதவிக் கல்வி அதிகாரிகளின் பணியிலும் குறை இருப்பதாகவே கல்வித் துறை ஆய்வில் தெரியவந்துள்ளது. தமிழ் வாசிப்பு மற்றும் எழுத்துத் திறன் குறைவாக உள்ள மாணவர்களுக்கு கணிதம், அறிவியல் போன்ற பாடங்களில் திறன் மேலும் குறைவாகவே இருப்பது இயற்கை.

இத்தகைய சூழலில் இருக்கும் மாணவர்களுக்கு கல்வித் துறை அதிகாரிகள் மற்ற ஊக்குவிப்பு முகாம்களை நடத்துவதற்கு முன்னதாக, இப்போதிருந்தே தமிழ்மொழி வாசிப்பு மற்றும் எழுத்துத் திறனை வளர்ப்பதற்கான சிறப்புத் திட்டத்தை செயல்படுத்த வேண்டியது அவசர அவசியமாகும். பல்வேறு தொழில்நுட்ப வளர்ச்சி ஏற்பட்டுள்ள இந்த கால கட்டத்தில், அரசுப் பள்ளிகளில் கல்வி போதிக்கும் முறையில் குறைபாடுகள் இருப்பது தவிர்க்கப்பட வேண்டும்.

கல்வித் துறை அதிகாரிகள், பள்ளிகளில் மற்ற முன்னோடி திட்டங்களை செயல்படுத்தும் அதே நேரத்தில், அரசுப் பள்ளி மாணவர்களுக்கு தமிழ்மொழி வாசிப்பு மற்றும் எழுத்துத் திறனை வளர்க்க, முழு ஈடுபாட்டுடன் செயல்பட ஆசிரியர்களையும் தயார்படுத்த வேண்டிய கட்டாயம் ஏற்பட்டுள்ளது. இதை கல்வித் துறை அதிகாரிகள் மட்டுமின்றி, ஆசிரியர்களும் உணர வேண்டும். இல்லையேல், அரசு பல ஆயிரம் கோடிகளை கல்விக்காக கொட்டினாலும், விழலுக்கு இறைத்த நீரைப் போன்று ஆகிவிடும்.

கே.எஸ். பசும்பொன்முத்து , தினமணி

சூரிய மின்சாரத்தில் ஜொலிக்கப் போகும் நாகப்பட்டினம் நகர காவல் நிலையம்!

தமிழகத்தில் முதல்முறையாக ஒரு காவல் நிலையம் முழுவதும் சூரிய ஒளி மின்சாரத்தில் ஜொலிக்கப் போகிறது.

சூரிய ஒளி மின்சாரத்துக்கான அனைத்து ஏற்பாடுகளும் முடிந்து விட்ட நிலையில் திறப்பு விழா காணத் தயாராக இருக்கிறது அந்த பெருமையைப் பெறப்போகும் நாகப்பட்டினம் நகர காவல் நிலையம்.

ஊராட்சிகளில் சூரிய ஒளி மின்சாரத்தில் தெருவிளக்குகள் ஒளிர்வதை நீங்கள் பார்த்திருக்கலாம். சில பள்ளிகள் மற்றும் கல்லூரிகளில் சூரிய ஒளி மின்சாரம் உற்பத்தி செய்யப்படுவது பற்றிக் கேள்விப்பட்டி ருக்கலாம், படித்தும் இருக்கலாம்.

தஞ்சாவூர் மாவட்டத்தில் ஒரு விவசாயி சூரிய ஒளி அமைப்பை ஏற்படுத்தி சாகுபடி மேற்கொண்டு வருகிறார். இது எல்லாவற்றிலும் மாறுபட்டதாக காவல் நிலையத்தில் சூரிய ஒளி மின்சாரம் உற்பத்தி செய்ய வழிவகை செய்யப்பட்டுள்ளது என்பதுதான் புதுமையான விஷயம்.

நாகப்பட்டினம் மாவட்டக் காவல் கண்காணிப்பாளர் சிபி சக்கரவர்த்தியின் ஆர்வம் காரணமாக இத்திட்டம் செயல் படுத்தப்பட்டிருக்கிறது. நாகப்பட்டினம் சேம்பர் ஆஃப் காமர்ஸ் அமைப்பை அணுகி இதற்கான செலவுகளை ஏற்றுக்கொள்ளச் செய்திருக்கிறார். அவர்களின் நிதியளிப்போடு மிகச் சிறப்பாக அமைக்கப்பட்டுள்ளது சோலார் பேனல் தகடுகள். நாகப்பட்டினம் நகர காவல் நிலையத்தின் மொட்டை மாடியில் 15-க்கு 10 அடி என்ற அளவில் அமைக்கப்பட்டிருக்கும் இந்த சோலார் பேனல் 2 கிலோவாட் மின்சாரத்தை உற்பத்தி செய்யும் திறன் படைத்தது. இதன் மூலம் நகரக் காவல் நிலையத்தின் முழு மின் தேவையையும் பூர்த்தி செய்துகொள்ள முடியும்.

“எஸ்.பி. இப்படி ஒரு யோசனையை சொன்னதும் நாங்கள் தட்டாமல் உடனே ஏற்றுக்கொண்டோம். காரணம் தற்போதைய நிலையில் மின் உற்பத்திக்கு நாடு கொடுத்துவரும் முக்கியத்துவத்தை நாங்களும் உணர்ந்திருக்கிறோம். மொத்தம் நான்கரை லட்சம் ரூபாய் வரை இதற்காக செலவழித்திருக்கிறோம். இத்தகைய பணியில் நாங்கள் பங்கேற்றுகொண்டது எங்களுக்கு பெருமைதான்” என்கிறார் சேம்பர் ஆஃப் காமர்ஸின் தலைவர் முருகையன்.

நகர காவல் நிலையத்தில் தற்போது ஆகும் மின்சார கட்டணத்தை வைத்து கணக் கிட்டால் 3 ஆண்டுகள் கட்டும் மின் கட்டணத் தொகைக்கு நிகரானது இந்த நான்கரை லட்சம் ரூபாய். அதற்குப் பிறகு கிடைக்கும் மின்சாரம் முழுவதும் உபரிதான். இந்த திட்டத்தின் மூலகர்த்தாவான காவல் கண்காணிப்பாளர் சிபி சக்கரவர்த்தி இதுகுறித்து ‘தி இந்து’விடம் கூறியது:

“இந்த முயற்சியைப் பற்றிக் கேள்விப்பட்ட மத்திய மண்டல ஐஜி தானே நேரில் வந்து திறந்து வைப்பதாக சொல்லியிருக்கிறார். அதனால் இந்த வார இறுதிக்குள் இது பயன்பாட்டுக்கு வந்துவிடும். இதன் வெற்றியைத் தொடர்ந்து மற்ற ஊர்களிலும் வர்த்தகர்கள் ஒத்துழைப்போடு இத்திட்டம் நடைமுறைப்படுத்தப்படும்” என்றார்.                                                                                    

செய்தி : தி இந்து 

திருகோணமலையில் மாபெரும் நடமாடும் புத்தகக் கண்காட்சி கப்பல்

லோகோஸ் ஹோப் என்னும் பெயருடைய உலகின் மாபெரும் நடமாடும் புத்தகக் கண்காட்சி கப்பல், திருகோணமலை சீனக்குடா அஷ்ரப் இறங்கு துறைமுகத்தினை வந்தடைந்துள்ளது.

இன்று (9) பிற்பகல் 3 மணியளவில் வந்த இந்தக் கப்பலில், 60 உலக நாட்டைச் சேர்ந்த 400 உதவியாளர்கள் உள்ளனர்.

9 தட்டுக்களைக் கொண்ட இக்கப்பலில் 5000 வகையான புத்தகங்களும் உள்ளன என இதன் இணைப்பாளர் கிறிஸ்தோகோபர் தெரிவித்தார்.

இவர் இந்தோனேசியாவைச் சேர்ந்தவர் ஆவார். எதிர்வரும் 16ம் திகதி வரை குறித்த கப்பல் திருகோணமலை சீனக்குடா துறைமுகத்தில் தங்கியிருக்கும் எனவும் அவர் மேலும் தெரிவித்தார்.

அத்துடன் கிழக்கு மாகாண ஆளுனர் தலைமையில் வௌ்ளிக்கிழமை காலை இது தொடர்பான வைபவம் ஆரம்பமாகவுள்ளது எனவும் குறிப்பிடப்பட்டுள்ளது.

http://www.tamilmaiyam.com/

தேர்தல் ஆணையம் கூகுளுடன் இணைந்து செயல்படும் திட்டத்தைக் கைவிட்டது;

பாராளுமன்றத் தேர்தல் நடைபெற இருப்பதையொட்டி, வாக்காளர்களுக்கு இணையதளம் மூலம் வாக்குச்சாவடிகளை கண்டறிவது, வாக்காளர் பட்டியல் தகவல்களை அறிந்து கொள்வது, தேர்தல் முடிவுகளை உடனுக்குடன் வெளியிடுவது என பல்வேறு வசதிகளை கூகுள் உதவியுடன் செயல்படுத்த தேர்தல் ஆணையம் தீர்மானித்து இருந்தது. கூகுள் நிறுவனம் அமெரிக்காவை தலைமையிடமாக கொண்டு செயல்படும் முன்னணி தேடு தளமாகும்.

தேர்தல் ஆணையத்திடம் உள்ள தகவல்கள் கூகுளுக்கு தரப்பட்டால் அது தேச பாதுகாப்புக்கு அச்சுறுத்தலாக அமையும். அமெரிக்காவின் புலனாய்வு அமைப்பான என்.எஸ்.ஏ. இணையதளங்கள் வாயிலாக ஊடுருவி உலக நாடுகளில் வேவு பார்த்த விவகாரத்தை சுட்டிக்காட்டி நிபுணர்கள் எச்சரித்தனர்.

இதனால் தேர்தல் ஆணையர்கள் எச்.எஸ்.பிரம்பா, எஸ்.என்.ஏ.ஜய்தி உள்பட அதிகாரிகள் கலந்தாலோசித்து கூகுள் நிறுவனத்துடன் இணைந்து செயல்படும் திட்டத்தை கைவிட ஒருமனதாக முடிவெடுத்தனர்.

செய்தி : தினத் தந்தி 

டெல்லி : 7 மணி நேரத்தில் மட்டும் 4 ஆயிரத்துக்கும் மேற்பட்ட புகார்கள்

 டில்லியில் ஊழல் புகார்களை தெரிவிக்க சிறப்பு தொலைபேசி எண்களை அம்மாநில அரசு அறிவித்தது. எண்கள் அறிவிக்கப்பட்ட முதல் நாளில், 7 மணி நேரத்தில் மட்டும் 4 ஆயிரத்துக்கும் மேற்பட்ட புகார்கள் வந்துள்ளன.

டில்லியில் வசிப்பவர்கள் ஊழல் தொடர்பான புகார்களை தொலைபேசி வாயிலாக அரசுக்கு தெரிவிக்கலாம் என ஆம் ஆத்மி அரசு அறிவிப்பு வெளியிட்டிருந்தது. இதற்காக (011) 27357169 என்ற எண்ணில் காலை 8 மணி முதல் இரவு 10 மணி வரை தொடர்பு கொள்ளலாம் எனவும் தெரிவிக்கப்பட்டிருந்தது. இன்று துவங்கிய இந்த சேவையில் இன்று காலை முதல் மாலை 3 மணி வரை 4 ஆயிரத்துக்கும் மேற்பட்ட புகார்கள் வந்துள்ளதாக டில்லி முதல்வர் அரவிந்த் கெஜ்ரிவால் தெரிவித்துள்ளார்.

அவரின் இந்த திட்டத்தின்படி, ஊழல் தொடர்பாக தெரிவிக்கப்படும் புகார்கள் உண்மை தானா என்பது ஆராயப்பட்டு, பின்னர் அவை 15 பேர் கொண்ட குழுவிற்கு அனுப்பப்படும். பின்னர் அக்குழுவின் ஆலோசனைப்படி, ஸ்டிங் ஆபரேஷன் நடத்தப்படும். அதில் கிடைக்கும் தகவல்கள் ஊழல் ஒழிப்பு துறைக்கு அனுப்பப்பட்டு, ஒவ்வொரு புகாருக்கும் 24 மணி நேரத்திற்குள் தீர்வு கிடைக்கும் என தெரிவிக்கப்பட்டுள்ளது.

இந்த திட்டம் குறித்து நிருபர்களிடம் பேசிய டில்லி முதல்வர் அரவிந்த் கெஜ்ரிவால், டில்லியில் பல்வேறு நேர்மையான மற்றும் ஒழுக்கமான அதிகாரிகள் உள்ளனர். அவர்கள் நேர்மையாக செயல்பட விரும்புகின்றனர். எனினும் தங்களுக்கு இதுவரை அதற்கான வாய்ப்பு கிடைக்க வில்லை என வருந்துகின்றனர். தவறு செய்பவர்கள் தங்களது தவறை திருத்திக்கொள்ள வேண்டும் அல்லது திருத்தப்படுவீர்கள். 

இவ்வாறு கெஜ்ரிவால் தெரிவித்துள்ளார். அரவிந்த் கெஜ்ரிவாலின் இந்த அதிரடி திட்டம் டில்லியில் பெரும் பரபரப்பை ஏற்படுத்தியுள்ளது. புகார்கள் அதிகரித்துள்ளதையடுத்து, இதில் பணிபுரிபவர்களின் எண்ணிக்கை மூன்று மடங்காக உயர்த்த அரசு முடிவு செய்துள்ளது.

செய்தி :தினமலர்

பொங்கலுக்கு சென்னையிலிருந்து முக்கிய நகரங்களுக்கு 6514 சிறப்புப் பேருந்துகள்

முதல்-அமைச்சர் ஜெயலலிதாவின் உத்தரவுப்படி  உழவர் திருநாளாம் பொங்கல் பண்டிகையை தமிழக மக்கள் தங்கள் சொந்த மண்ணில் மகிழ்ச்சியுடன் கொண்டாட வேண்டும் என்ற நோக்கத்தின் அடிப்படையில், அவர்கள் எவ்வித சிரமமும் இன்றி சௌகரியமாகத் தங்கள் சொந்த ஊர்களுக்குச் சென்று வர ஏதுவாக தமிழ்நாடு அரசுப் போக்குவரத்துக் கழகங்களின் சார்பில் சிறப்புப் பேருந்துகளை இயக் கவும், சிறப்பு வசதிகளைச் செய்துதரவும்  ஏற்பாடுகள் செய்யப்பட்டுள்ளன.  

இதன்படி, சென்னை கோயம்பேடு புறநகர் பேருந்து நிலையத்திலிருந்து அனைத்து மாவட்டத் தலைநகரங்கள் மற்றும் மாநிலத்தின் முக்கிய ஊர்களுக்கு 10.1.2014 அன்று 600 சிறப்புப் பேருந்துகளும், 11.1.2014 அன்று 1325 சிறப்புப் பேருந்துகளும், 12.1.2014 அன்று 1175 சிறப்புப் பேருந்துகளும், 13.1.2014 அன்று 339 சிறப்புப் பேருந்துகளும் இயக்கப்படும்.

14.1.2014 அன்று பயணிகள் தேவைக்கேற்ப சிறப்பு பேருந்துகள் இயக்கப்படும்.இதே போன்று சென்னையைத் தவிர்த்து மாநிலம் முழுவதிலும் இருந்து, 10.1.2014 அன்று 345 சிறப்புப் பேருந்துகளும், 11.1.2014 அன்று 750 சிறப்புப் பேருந்துகளும், 12.1.2014 அன்று 760 சிறப்புப் பேருந்துகளும், 13.1.2014 அன்று 1220 சிறப்புப் பேருந்துகளும் இயக்கப் படும்.மொத்தத்தில் 10.1.2014 முதல் 13.1.2014 வரை 6,514 சிறப்புப் பேருந்துகள் இயக்கப்படும்.

மேலும், நான்கு நாட்கள் நடைபெறும் பொங் கல் பண்டிகையினை உறவி னர்கள்,  நண்பர்களு டன் கோலாகலமாக கொண் டாடிவிட்டு ஊர் திரும்பிட வசதியாக, இதே அளவிலான  சிறப்புப் பேருந்துகளை 16.1.2014 முதல் 19.1.2014 வரை இயக்கவும்  முதல்&அமைச்சர் ஜெயலலிதா உத்தரவிட்டுள் ளார்.

பொங்கல் பண்டிகையை ஒட்டி 300 கி.மீ. தூரத்திற்கு மேல்  இயக்கப்படும் சிறப்புப் பேருந்துகளுக்கு, இணையதள பயணச் சீட்டு முன்பதிவு முறையில்,  www.tnstc.in என்ற இணையதளம் மூலம், பயணச்சீட்டு முன்பதிவு செய்யும் வசதியும்  செய்யப்பட்டுள்ளது.  இதுதவிர கணினி மூலம் உடனடி தள முன்பதிவு செய்யும் வகையில் சென்னை கோயம்பேடு பேருந்து நிலையத்தில் 25 சிறப்பு முன்பதிவு மையங்கள் செயல்படவும் ஏற்பாடுகள் செய்ய  முதல்&அமைச்சர் ஜெயலலிதா உத்தரவிட்டுள்ளார்.

மேலும், முதல்அமைச்சர் ஜெயலலிதாவின் உத்தரவுப் படி, சென்னை மாநகர் போக்குவரத்துக் கழகத்தின் சார்பில் ஜனவரி 14 முதல் 16 வரை சென்னை மற்றும் புறநகர் பொதுமக்கள் பயன்பெறும் வகையில் சுற்றுலா பொருட்காட்சி, அண்ணா சதுக்கம், காந்தி மண்டபம், வி.ஜி.பி., முட்டுக்காடு, கோவளம், எம்.ஜி.எம்., மாமல்லபுரம், வண்டலூர் உயிரியல் பூங்கா, கிஷ்கிந்தா, குயின்ஸ் லாண்டு போன்ற பல்வேறு சுற்றுலா மையங்களுக்கு 250 சிறப்புப் பேருந்துகள் இயக்க ஏற்பாடுகள் செய்யப்பட்டு உள்ளன.

பொங்கல் பண்டிகையை யட்டி, அதிக கட்டணம் வசூலிக்கும் தனியார் பேருந்து கள் குறித்து சென்னை, கோயம்பேடு புறநகர் பேருந்து நிலையத்திலுள்ள அரசு விரைவு போக்குவரத்துக் கழக அலுவலக தொலை பேசி எண்: 24794709-க்கு பொதுமக்கள் புகார் தெரி விக்கவும் வசதிகள் செய்யப் பட்டுள்ளன.  முதல்-அமைச்சர் ஜெயலலிதா அரசின் மேற்காணும் மக்கள் நல நடவடிக்கைகள், தமிழக மக்கள் அனைவரும் தங்கள் சொந்த ஊர்களில்  தமிழர் திருநாளாம் பொங்கல் பண்டிகையைக் கொண்டாட வழிவகை செய்யும். இவ்வாறு அதில் கூறப் பட்டுள்ளது.

Advertisement

தமிழக அரசு வெளியிட்டுள்ள செய்திக் குறிப்பு.

பாராளுமன்றத் தேர்தல் தேதி மார்ச் முதல் வாரத்தில் வெளியாகும்

பாராளுமன்றத்  தேர்தல் தேதி மார்ச் முதல் வாரத்தில் வெளியாகும்: தேர்தல் கமிஷன் தீவிர பரிசீலனை

உலகின் மிகப்பெரிய ஜனநாயக நாடு என்ற பெருமைக்குரிய இந்தியாவில் தற்போது 15-வது பாராளுமன்றம் செயல்பட்டு வருகிறது. இதன் பதவிக்காலம், வரும் ஜூன் 1-ந்தேதி முடிகிறது. புதிய 16-வது பாராளுமன்றம் மே 31-ந்தேதிக்குள் அமைக்கப்படவேண்டும். இதற்கு ஏற்ற வகையில் புதிய பாராளுமன்ற தேர்தலை நடத்துவதற்கான பூர்வாங்க வேலைகளில் தேர்தல் ஆணையம் முழு வீச்சில் ஈடுபட்டு வருகிறது. அந்த வகையில் வாக்காளர்கள் பட்டியலில் அடுத்த மாத இறுதிக்குள் திருத்தங்கள் செய்து முடிக்க வேண்டும் என அனைத்து மாநில, யூனியன் பிரதேச தலைமை தேர்தல் அதிகாரிகளுக்கு தேர்தல் கமிஷன் உத்தரவிட்டுள்ளது.

இதையடுத்து வாக்காளர் பட்டியலில் திருத்தங்கள் செய்து இறுதி செய்யும் பணி தற்போது முடுக்கி விடப்பட்டுள்ளது. வரும் பாராளுமன்ற தேர்தலில் மொத்தம் 80 கோடி வாக்காளர்கள் வாக்குரிமை பெற்றிருப்பார்கள். இந்த தேர்தலை 5 அல்லது 6 கட்டங்களாக நடத்தி முடிக்க தேர்தல் கமிஷன் பரிசீலித்து வருகிறது. 

பாராளுமன்ற தேர்தல் தேதி குறித்து தேர்தல் கமிஷன் வட்டாரங்கள் கூறுகையில், “தேர்தல் அட்டவணை அடுத்த மாதத்தின் கடைசி நாட்கள் அல்லது மார்ச் மாதம் முதல் 3 தினங்களில் அறிவிக்கப்படலாம்” என தெரிவித்தன.

முதல் கட்டத்தேர்தலுக்கு 6 வாரங்களுக்கு முன்பாக தேர்தல் அட்டவணை வெளியிடப்படும் என்பது குறிப்பிடத்தக்கது. அதற்கு முன்பாக, பாராளுமன்ற தேர்தலை சுமுகமாகவும், நேர்மையாகவும், எந்தவித அசம்பாவிதங்களும் இன்றி அமைதியாக நடத்தி முடிப்பதற்கு செய்ய வேண்டிய பாதுகாப்பு ஏற்பாடுகள் குறித்து மத்திய அரசின் உள்துறை செயலாளருடன் தேர்தல் கமிஷன் ஆலோசனை நடத்தும். கடந்த பாராளுமன்ற தேர்தல் ஏப்ரல் 16-ந்தேதி தொடங்கி மே 13-ந்தேதி வரை 5 கட்டங்களாக நடத்தி முடிக்கப்பட்டது. ஓட்டுக்கள் மே 16-ந்தேதி எண்ணி முடிவுகள் அறிவிக்கப்பட்டன. தேர்தல் அட்டவணை மார்ச் 2-ந்தேதி அறிவிக்கப்பட்டது.

எனவே வரும் பாராளுமன்ற தேர்தலும் இதே போன்று ஏப்ரல் 16-ந்தேதி தொடங்கி மே 13-ந்தேதி வரை 5 அல்லது 6 கட்டங்களாக நடத்தி முடிக்கப்படும் என தகவல்கள் கூறுகின்றன.

இந்த பாராளுமன்ற தேர்தலுக்கு ஒரு கோடியே ஒரு லட்சம் பணியாளர்கள் தேவைப்படுவார்கள், அவர்களில் சரிபாதியளவினர் பாதுகாப்பு படையினர் ஆவார்கள். தேர்தல் பாதுகாப்பு ஏற்பாடுகள் குறித்து மாநில தலைமை தேர்தல் அதிகாரிகள் போலீஸ் டி.ஜி.பி.க்களுடன் ஆலோசனை நடத்தி வருகிறார்கள். தேர்தல் பணியாளர்கள் பட்டியலை தயாரிக்கும் பணியும் நடந்து வருகிறது. தேர்தலில் பதற்றமான பகுதிகளில் குறும்பார்வையாளர்களாக நியமிக்கப்படவேண்டிய மத்திய அரசு அதிகாரிகளின் பட்டியலும் தயாரிக்கப்பட்டு அதற்கான இறுதிவடிவம் கொடுக்கப்பட்டு வருகிறது.

இதேபோன்று வாக்குச்சாவடிகளும் இறுதி செய்யப்பட்டு வருகின்றன. மொத்தம் 8 லட்சம் வாக்குச்சாவடிகள் அமைக்கப்பட உள்ளன. வாக்காளர்கள், வாக்குப்பதிவு அதிகாரிகள் மற்றும் பணியாளர்கள் வசதிக்கு ஏற்ற வகையில் சிற்சில வாக்குச்சாவடிகள் மட்டும் மாற்றி அமைக்கப்படுகின்றன. இந்த தேர்தலுக்கு 12 லட்சம் மின்னணு ஓட்டு எந்திரங்கள் தேவைப்படும் என கணக்கிடப்பட்டுள்ளது.

தேர்தல் கமிஷன் பல்வேறு பொதுத்துறை நிறுவனங்களிடமிருந்து அடுத்த மாத மத்திக்குள் 2½ லட்சம் புதிய எந்திரங்களை வாங்க உள்ளது. ஒட்டு மொத்த தேர்தல் பணிகளும் 3 மாத காலத்திற்கு நடைபெறும் என தெரிய வந்துள்ளது.

பாராளுமன்ற தேர்தலுடன் 3 மாநில சட்டசபை தேர்தலும் சேர்த்து நடத்தப்பட வாய்ப்பு உள்ளது. அந்த மாநிலங்கள் ஆந்திரா, ஒடிசா, சிக்கிம் ஆகும். ஆந்திர சட்டசபையின் பதவிக்காலம் ஜூன் 2-ந்தேதியும், ஒடிசா சட்டசபையின் பதவிக்காலம் ஜூன் 7-ந்தேதியும், சிக்கிம் சட்டசபையின் பதவிக்காலம் மே 21-ந்தேதியும் முடிகிறது. எனவே இந்த மாநிலங்களுக்கு பாராளுமன்றதேர்தலுடன் சட்டசபை தேர்தல் நடக்க வாய்ப்பு உள்ளது. ஆனால் ஆந்திர மாநிலத்தை பிரித்து தனி தெலுங்கானா மாநிலம் உருவாக்கும் பிரச்சினை உள்ளதால், பாராளுமன்ற தேர்தலுக்கு முன்பாக இது நடந்து முடியுமா என்ற கேள்வி எழுந்துள்ளது.

பாராளுமன்ற தேர்தலுக்கு முன்னதாக பாராளுமன்றம் ஒரு முறை கூடும். அப்போது இடைக்கால பட்ஜெட் தாக்கல் செய்யப்படும். கிடப்பில் போடப்பட்டுள்ள முக்கிய மசோதாக்களை நிறைவேற்ற ஒரு சிறப்பு கூட்டத்தொடர் விரைவில் நடத்தப்படவும் வாய்ப்பு உள்ளதாக தகவல்கள் கூறுகின்றன.                                                                                                                                   

செய்தி : மாலைமலர் 

உறைபனியில் சிக்கிய சீன மீட்புக் கப்பலை விட்டுவிட்டுப் பயணத்தை தொடரும் ஆஸ்திரேலிய கப்பல்

கடந்த 1911-14 ஆம் ஆண்டுகளில் அண்டார்டிகாவில் ஆராய்ச்சி மேற்கொண்ட சர் டக்லஸ் மாசனின் நூற்றாண்டு விழாவைக் கொண்டாட எண்ணிய விஞ்ஞானிகள், சுற்றுலாப் பயணிகள், பத்திரிகையாளர்கள் அடங்கிய 52 பேர் கொண்ட குழு ஒன்று கடந்த நவம்பர் மாதம் 28 ஆம் தேதி அண்டார்டிகா நோக்கிப் பயணமானார்கள். 

அவர்களைச் சுமந்து சென்ற அகடெமிக் ஷோகல்ஸ்கி என்ற ரஷ்யக்கப்பல் கடந்த டிசம்பர் மாதம் 24 ஆம் தேதி பிரெஞ்சுத்தளமான டுமோன்ட் டி உர்வில்லேயிலிருந்து 100 கடல்மைல் தொலைவில் உறைபனியில் சிக்கி நிலைகொண்டது.

இதனை மீட்க பிரான்ஸ், சீனா மற்றும் ஆஸ்திரேலிய மீட்புக் கப்பல்கள் சென்றன. கடந்த சனிக்கிழமையில் இருந்து ரஷ்யக் கப்பலின் அருகே செல்ல முயன்ற முயற்சிகள் பலிக்காத நிலையில், கடந்த வியாழக்கிழமை அன்று சீனக் கப்பலில் இருந்த 52 பயணிகளும் ஹெலிகாப்டர் மூலம் பத்திரமாக ஆஸ்திரேலியக் கப்பலுக்கு மாற்றப்பட்டனர். பின்னர் தனது பயணத்தைத் தொடங்க நினைத்தபோது சீனாவின் மீட்புக் கப்பல் ஒரே இடத்தில் நின்றிருந்ததால் உறை பனியில் சிக்கிக்கொண்டது. இன்று காலை வானிலையும், கடலின் தன்மையும் சாதகமாக இருந்தால் வெளிவர முயற்சிக்கலாம் என்று நினைத்திருந்தனர். சீனக் கப்பலுக்கு உதவி தேவைப்படும் என்ற எண்ணத்தில் ஆஸ்திரேலியக் கப்பலும் அங்கேயே நிறுத்தப்பட்டது.

இன்று காலையும் சீனக் கப்பலை வெளிக்கொண்டுவர முடியவில்லை. ஏற்கனவே ரஷ்யக் கப்பலும் அதன் 22 ஊழியர்களுடன் அங்கேயே உள்ளது. எனவே, தாங்கள் இருவரும் பரஸ்பரம் ஒருவருக்கொருவர் உதவிக்கொண்டு காலநிலை மாற்றத்தைப் பொறுத்து திரும்பலாம் என்று இரு கப்பலின் ஊழியர் தலைவர்களும் முடிவு செய்ததை அடுத்து ஆஸ்திரேலியக் கப்பல் தனது பயணத்தை இன்று துவக்குவதாக ஆஸ்திரேலியக்  கடல் பாதுகாப்பு ஆணையம் தெரிவித்துள்ளது.

இரண்டு கப்பல்களிலுமே தேவையான உணவுப் பொருட்கள் கையிருப்பு உள்ளதால் பிரச்சினைகள் எதுவுமில்லை என்று தெரிவிக்கப்பட்டுள்ளது. 52 பயணிகளுடன் கிளம்பும் ஆஸ்திரேலிய மீட்புக் கப்பல் அண்டார்டிகாவின் கேசி தளத்தில் சில பொருட்களை இறக்கிவிட்டு ஆஸ்திரேலியாவின் ஹோபர்ட் துறைமுகத்திற்கு செல்லவிருப்பதாகவும் ஆணையம் குறிப்பிட்டுள்ளது.                                                                                                                         

செய்தி : மாலைமலர்

பா. விஜய்யின் தன்னம்பிக்கைக் கவிதை

தன்னம்பிக்கைக் கவிதை

நம்பிக்கையுடன்
மரங்கள் காற்றைச்
சுத்தம் செய்கின்றன
நம்பிக்கை மனசை
சுத்தம் செய்கிறது

கர்வம் வை
கிராம்; கணக்கில்!

நம்பிக்கை வை
கிலோ கணக்கில்!

நகம்கூட
நாளுக்கு
.001 அங்குலம்
வளர்கின்றது

நாம்?

பாடநூல்களை அச்சிட டெண்டர்: 197 நிறுவனங்கள் பங்கேற்பு

தமிழ்நாட்டுப் பாடநூல் கழகத்தின் சார்பில் பாடநூல்களை அச்சிடுவதற்கான ஒப்பந்தப் புள்ளிகளை 197 நிறுவனங்கள் சமர்ப்பித்துள்ளன.

தமிழகம் முழுவதும் 1 முதல் 12 ஆம் வகுப்பு வரை படிக்கும் மாணவர்களுக்கான புத்தகங்கள் தமிழ்நாட்டுப் பாடநூல் கழகம் சார்பில் அச்சிடப்பட்டு வழங்கப்படுகிறது. இந்தப் புத்தகங்களை அச்சிட்டு வழங்குவதற்கான விலை இரண்டு ஆண்டுகளுக்கு ஒருமுறை புதிதாக நிர்ணயிக்கப்பட வேண்டும். முதல் கட்டமாக, தொழில்நுட்ப ஒப்பந்தப்புள்ளியில் 197 நிறுவனங்கள் பங்கேற்றுள்ளன.

இது தொடர்பாக பாடநூல் கழக வட்டாரங்கள் கூறியது:

தமிழகத்தில் உள்ள அச்சகங்களோடு தில்லி, ஹைதராபாத் உள்ளிட்ட நகரங்களில் உள்ள நிறுவனங்களும் புத்தகங்களை அச்சிட ஆர்வத்துடன் உள்ளன.முதல் கட்டமாக, தொழில்நுட்ப ஒப்பந்தப்புள்ளிகளை சம்பந்தப்பட்ட நிறுவனங்கள் சமர்ப்பித்துள்ளன. இதைத் தொடர்ந்து அந்த அச்சக நிறுவனங்களில் நேரடியாக ஆய்வு நடத்தப்படும். அதன் பிறகு, தகுதியான நிறுவனங்களிடமிருந்து புதிய விலை நிர்ணயம் செய்வதற்கான ஒப்பந்தப் புள்ளிகள் கோரப்படும்.

இதில் குறைந்த விலை எதுவோ, அந்த விலைக்குப் புத்தகங்களை அச்சிட விரும்பும் நிறுவனங்களின் பட்டியல் தயாரிக்கப்படும். அந்தப் பட்டியலில் உள்ள நிறுவனங்களோடு ஒப்பந்தம் போடப்பட்டு, அடுத்த 2 ஆண்டுகளுக்குப் புத்தகங்களை அச்சிடுவதற்கான ஆணைகள் அவர்களுக்கு வழங்கப்படும் என அந்த வட்டாரங்கள் தெரிவித்தன.                                                                                   

செய்தி : தினமணி  :

ஆன்லைன் மூலம் மட்டுமே, பணம் செலுத்த முடியும்.!

சென்னை:தமிழ்நாடு அரசு கேபிள், "டிவி' நிறுவனத்தில், கேபிள் ஆபரேட்டர்கள், மார்ச் மாதம் 1ம் தேதியில் இருந்து, ஆன்லைன் மூலம் மட்டுமே, பணம் செலுத்த முடியும்.

தமிழ்நாடு அரசு கேபிள், "டிவி' நிறுவனம், ஏற்கனவே அறிவித்தபடி, மாதாந்திர கட்டணத் தொகை, 5,000 ரூபாய்க்கு மேல் செலுத்த வேண்டிய, உள்ளூர் கேபிள் ஆபரேட்டர்கள், பன்முனை கேபிள் ஆபரேட்டர்கள், தனியார் உள்ளூர் "டிவி' உரிமையாளர்கள், இம்மாதம் 1ம் தேதியில் இருந்து, நேரடியாக ஆன்லைன் முறையில், www.tactv.in என்ற இணையதளம் மூலம் மட்டுமே, செலுத்த முடியும்.

மேலும், இந்நிறுவனத்தில் பதிவு செய்துள்ள அனைவரும், மார்ச் 1ம் தேதியில் இருந்து, ஆன்லைன் முறையில் மட்டுமே, மாதாந்திர கட்டணம் செலுத்த இயலும். அதன் பின், சலான் மூலம், கட்டணம் செலுத்தும் வசதி இருக்காது.எனவே, அனைவரும், வங்கிகளை அணுகி, ஆன்லைன் வசதியைப் பெற்று, அதன் மூலம், கட்டணம் செலுத்தும்படி, அரசு கேபிள், 'டிவி' நிறுவனம் அறிவித்துள்ளது.

செய்தி : தினமலர்

சென்னை புத்தகக் கண்காட்சி : 760 அரங்குகள் கணினி மூலம் ஒதுக்கீடு

• புகைப்படங்கள்

• 

சென்னையில் நடைபெறவிருக்கும் தென்னிந்திய புத்தகக் கண்காட்சியில் பதிப்பாளர்களுக்கு அரங்குகளை ஒதுக்க கணினி மூலம் குலுக்கல் நடத்தப்பட்டது. இதில் மொத்தம் 760 அரங்குகள் ஒதுக்கப்பட்டுள்ளன.

தென்னிந்திய புத்தக விற்பனை மற்றும் பதிப்பாளர்கள் சங்கம் சார்பில் 37-ஆவது ஆண்டாக ஜனவரி 10-ந்தேதி முதல் 22-ந்தேதி வரை நந்தனத்தில் உள்ள ஒய்.எம்.சி.ஏ மைதானத்தில் புத்தகக் கண்காட்சி நடைபெறவுள்ளது.

இதில் பங்கேற்கும் பதிப்பகங்களுக்கான அரங்கு ஒதுக்கீடு வியாழக்கிழமை மாலை 3 மணியளவில் நடைபெற்றது.

முப்பத்தாறு ஆண்டுகளாக இருந்துவந்த நடைமுறையை மாற்றி முதல் முறையாக கணினி மூலம் அரங்குகளுக்கான குலுக்கல் நடைபெற்றது.

இதில் 500 பதிப்பாளர்கள் பங்கேற்றனர். ஒதுக்கப்பட்ட அரங்குகள் குறித்த vவிவரங்கள் http:www.bapasi.com என்ற இணையத்தில் வெளியிடப்பட்டுள்ளது.

செய்தி : தினமணி

நேதாஜி மரணம் தொடர்பான ஆவணங்கள்: ஆர்டிஐ மனுவுக்கு பதிலளிக்க குடும்பத்தினர் வலியுறுத்தல்

நேதாஜி சுபாஷ் சந்திரபோஸின் மர்ம மரணம் தொடர்பான ஆவணங்களை வெளியிடுமாறு தகவல் அறியும் உரிமைச் சட்டத்தின் (ஆர்டிஐ) கீழ் கோரப்பட்டதற்கு பதிலளிக்குமாறு அவரது குடும்பத்தினர் மேற்கு வங்க முதல்வர் மம்தா பானர்ஜியை வலியுறுத்தியுள்ளனர்.

சிங்கப்பூரில் இந்திய தேசிய ராணுவத்தை உருவாக்கி வெள்ளையரை எதிர்த்துப் போரிடத் திட்டமிட்ட நேதாஜி 2ஆம் உலகப் போருக்குப் பிறகு மாயமானார். அவரது மரணம் குறித்த மர்மம் இன்றளவும் நீடிக்கிறது.

நேதாஜியின் மரணம் குறித்த ஆவணங்களை அளிக்குமாறு தகவல் அறியும் உரிமைச் சட்டத்தின் கீழ் தில்லியைச் சேர்ந்த வரலாற்று ஆராய்ச்சியாளர் அனுஜ் தார் கோரியிருந்தார். அதற்கு மேற்கு வங்க முதல்வர் அலுவலகம் பதில் அளிக்கவில்லை.

இந்நிலையில், மேற்கண்ட ஆவணங்களை மேற்கு வங்க அரசு வெளியிட வேண்டும் என்று நேதாஜியின் குடும்பத்தைச் சேர்ந்த சந்திரகுமார் போஸ் வலியுறுத்தியுள்ளார்.

அவர் கொல்கத்தாவில் செய்தியாளர்களிடம் திங்கள்கிழமை கூறியதாவது:

நேதாஜி தொடர்பான மத்திய அரசின் ரகசிய ஆவணங்களைப் பெறுவதில் தலையிடுமாறு மேற்கு வங்க முதல்வருக்கு நேதாஜி குடும்பத்தைச் சேர்ந்த 30 பேர் கடந்த ஆண்டு நவம்பர் மாதத்தில் கடிதம் எழுதினர். ஆனால், அந்தக் கடிதம் கிடைத்தது என்ற தகவலைக் கூட முதல்வர் அலுவலகம் தெரிவிக்கவில்லை. முதல்வரைச் சந்திப்பதற்கு முயற்சி மேற்கொண்டும் அவரைச் சந்திக்க இயலவில்லை என்றார் சந்திரகுமார் போஸ்.                                
 செய்தி : தினமணி                          

இயற்கை வேளாண் விஞ்ஞானி நம்மாழ்வார் இயற்கை எய்தினார்

நம்மாழ்வார்

இயற்கை வேளாண் விஞ்ஞானி நம்மாழ்வார் காலமானார்

இயற்கை வேளாண் விஞ்ஞானி நம்மாழ்வார் இன்று (திங்கள்கிழமை) காலமானார். அவருக்கு வயது 75.

சமீப காலமாக மீத்தேன் வாயு திட்டத்தை எதிர்த்து போராட்டம் நடத்தி வந்த அவர், பட்டுக்கோட்டையின் அத்திவெட்டி அருகே உள்ள பிச்சினிக்காட்டில் தங்கியிருந்தார்.

இந்நிலையில், உடல் நலக்குறைவு காரணமாக இன்று இரவு சுமார் 9.30 மணியளவில் அவர் மரணமடைந்தார்.

தன் கடைசி காலம் வரை விவசாயிகளிடையே இயற்கை வேளாண்மை குறித்து விழிப்புணர்வு ஏற்படுத்தி வந்த நம்மாழ்வார், தமிழகத்தில் இயற்கை வேளாண்மைக்கு முக்கியத்துவம் தரப்பட்டு வருவதில் பெரும் பங்கு வகித்தவர்.

உலக நாடுகள் புவி வெப்பமடைதல் பாதிப்பை குறைப்பதற்குப் பல்வேறு நடவடிக்கைகளில் ஈடுபட்டு வரும் நிலையில், இது குறித்த விழிப்புணர்வை தமிழகத்தில் ஏற்படுத்தியதுடன், அதற்கு வித்திடும் இயற்கை வேளாண்மையைப் பரவலாக்குவதற்குப் பாடுபட்டவர்.

கோ. நம்மாழ்வார், தஞ்சை மாவட்டம், திருக்காட்டுப்பள்ளியில் 1938 ஆம் ஆண்டு மே மாதம் 10 ஆம் தேதி பிறந்தார். அண்ணாமலைப் பல்கலைக்கழகத்தில் வேளாண்மை இளங்கலைப் படிப்பை முடித்தார்.

சில காலம் கோவில்பட்டி மண்டல மழைப்பயிர் ஆய்வகத்தில் பணியாற்றியவர், அரசின் செயல்பாடுகளில் அதிருப்தி அடைந்து, அங்கிருந்து வெளியேறினார். அதன் பின், இயற்கை வேளாண்மை விழிப்புணர்வுப் பிரச்சாரத்துக்காக தன் வாழ்க்கையையே முழுமையாக அர்ப்பணித்துக்கொண்டார்.

கரூர் மாவட்டம் வானகத்தில் ஒரு தன்னார்வ மாதிரி பண்ணை உருவாக்கி, அதனை மிகச் சிறப்பாக நடத்தி வந்த நம்மாழ்வார், இயற்கை வேளாண் முறைகளின் மூலம் பல்லுயிர் வாழும் கானகமாகவே அந்தப் பண்ணையை மாற்றினார்.

இயற்கை வேளாண்மையையொட்டிய பல்வேறு நூல்களை எழுதிய இவர், தனது வயதையும் பொருட்படுத்தாமல் மாநிலத்தின் பல பகுதிகளிலும் கருத்தரங்குகளில் பங்கேற்று, அடுத்தத் தலைமுறைக்கு இயற்கை வேளாண்மை மற்றும் சுற்றுச்சூழல் பாதுகாப்பு குறித்து விழிப்புணர்வு ஏற்படுத்தி வந்தார் என்பது குறிப்பிடத்தக்கது.

நம்மாழ்வாரின் மறைவிற்கு பல்வேறு ஆர்வலர்கள் இரங்கல் தெரிவித்துள்ளனர். தமிழ் இணையச் சூழலில், ஃபேஸ்புக் மற்றும் ட்விட்டர் சமூக வலைத்தளங்களிலும் அவருக்கு நினைவாஞ்சலி செலுத்தப்பட்டு வருகிறது.                                                                                                                             

செய்தி : தி இந்து

பறவை காவலன் - தமிழணணல்

மூவாயிரம் ஆண்டுகளுக்கு முன் உயிர்களை, ஆறரிவுடையன எனப் பகுத்து, உணர்த்துதற்குத் தொல்காப்பியர்க்கு வாய்த்தது, அன்றைய இயற்கைச் சூழலே. தமிழர்கள் இயற்கையுடன் ஒன்றி, வேறுபாடின்றி உறவு கொண்டாடி வாழ்ந்தது ஒரு புதுமையாகும்.

"பறவை காவலன்' எனப் போற்றப்பட்ட, ஆஅய் எயினன் தனது நாட்டில் உள்ள காடுகள், தோட்டம் துரவு அனைத்திலும் பறவைகளுக்கு எவ்வித இடையூறும் ஏற்படாமல், தானே முன்நின்று அவற்றை வளர்த்து வந்துள்ளான். அவன் அருளுடையவன், சொன்ன சொற்பிழையாதவன். "புன்னாடு' என்னும் நாட்டினை, நன்னன் என்பான் துன்புறுத்திய காலத்து, அந்நாட்டு மக்களைக் காப்பதாக ஆஅய் எயினன் உறுதி கூறினான்.

நன்னனுடைய நண்பன் மிஞிலி. புன்னாடு காரணமாக, ஆஅயுடன் பாழிப் பறந்தலையில் நன்னன் போர் தொடுத்தனன். அவனுக்குத் துணையாக மிஞிலி என்பானும் போரிடலானான். கடும்போரில் மிஞிலியால் ஆஅய் எயினன் கொல்லப்பட்டான். அது நண்பகற்போது. கடும் வெயில். நிலைமை அறிந்த பறவைகள் எல்லாம் ஒருங்குகூடித் தம் சிறகுகளால் குடைபோல பந்தரிட்டு, நிழலைச்செய்து ஆஅயின் உடலைப் பாதுகாத்தன. இக்காட்சியைக் காணச் சகிக்காத நன்னனுக்கு பொறாமையால் கடுஞ்சினம் பொங்கியதாம்.

""..... ..... ஆஅய் எயினன்

அளியியல் வாழ்க்கைப் பாழிப் பறந்தலை

இழைஅணி யானை இயல்தேர் மிஞிலியொடு

நண்பகல் உற்ற செருவில் புண்கூர்ந்து

ஒள்வாள் மயங்கமர் வீழ்ந்தெனப் புள்ளொருங்கு

அங்கண் விசும்பின் விளங்கு ஞாயிற்று

ஒண்கதிர் தெறாமைச் சிறகரில் கோலி

நிழல் செய்து'' (பரணர், அகம்.208)

அனைத்துப் பறவைகளும் தத்தம் சிறகுகளை விரித்துக் குடைபோல் கோலி, நிழல்செய்து "புள்ளிற்கு' ஏமமாகிய (காவலாகிய) அருளாளனைக் காத்தனவாம். அகநானூறு 142, 181, 396 ஆகிய பாடல்களிலும் பரணர் ஒருவரே இச் செய்தியைப் பதிவு செய்துள்ளார்.

அண்மையில் சிறுமலை அருகே ஒரு நிலக்கிழார், அகவை முதிர்ந்த நிலையில் தோப்பிலேயே தங்கி, உணவு உண்டு வாழலானார். ஒரு நாயையும் பல பறவைகளையும் போற்றி, உணவு வேளையில் தமக்கு வந்த உணவில் ஒரு பங்கைப் படைத்து அவை உண்ணச் செய்து வந்தார். அவர் காலமான அன்றும் பிறகும், அவர் படுத்திருந்த இடத்தையே நாய் சுற்றிச்சுற்றி வந்ததாம். நாள்தோறும் குறிப்பிட்ட உணவு வேளையில் பறவைகள் வந்து, பெரியவரைக் காணாது கூக்குரலிட்டுக் கூடிக் கத்தியதாம். இவ் அவலக் காட்சியைப் பலரும் பார்த்து வியந்தனராம்!

மனித உறவுகளைவிடச் சிற்றுயிர்களின் உறவு மேலானது போலும் என்று எண்ணத் தோன்றுகிறது.                                                                                                             

தமிழ்மணி, தினமணி, 29 - 12 - 2013                                                                                              

ஈழத் தமிழர் படுகொலைக்குக் காரணமானவர்களை தோற்கடிக்க வேண்டும்

ஈழத் தமிழர் படுகொலைக்குக் காரணமானவர்களை வரும் மக்களவைத் தேர்தலில் தோற்கடிக்க வேண்டும் என உலகத் தமிழர் பேரமைப்பின் தலைவர் பழ.நெடுமாறன் கேட்டுக் கொண்டார்.



மதுரை புதூர் அருகே

மனித உரிமைக்கான குடிமக்கள் இயக்கம்

சார்பில் சனிக்கிழமை நடைபெற்ற மனித உரிமை மாநாட்டில்,

"இலங்கையில் மனித உரிமை மீறலும், ஐக்கிய நாடுகள் சபை செயல்பாடும்'

என்ற தலைப்பில் அவர் ஆற்றிய உரை:
இலங்கையில் போர் முடிந்த நிலையிலும், வடக்கு மாகாணம் தொடர்ந்து ராணுவக் கட்டுப்பாட்டிலேயே உள்ளது. எதிர்க்கட்சியினர் அரசுக்கு எதிராக கருத்துத் தெரிவிக்க அச்சப்படுகின்றனர். புதிதாகத் தேர்வான இலங்கை ராணுவ வீரர்களுக்கு இந்தியாவே பயிற்சி அளிக்கிறது.

இலங்கை வடக்கு மாகாண, புதிய முதல்வர் விக்னேஷ்வரனை அங்குள்ள இலங்கை ராணுவ ஆளுநர் முடக்கி வைக்கிறார். இதனால், பதவியை ராஜிநாமா செய்யவும் விக்னேஷ்வரன் முடிவு செய்துள்ளார். அதனால், தனக்கு சர்வதேச அளவில் நெருக்கடி ஏற்படும் என அஞ்சியுள்ள இலங்கை அதிபர் ராஜபட்ச, வடக்கு மாகாண முதல்வரை சமரசம் செய்து வருகிறார்.

முதல் உலகப் போரில் ஹிட்லரின் நாஜிப்படைகள் செய்த படுகொலையைச் சர்வதேச சங்கம் கண்டுகொள்ளவில்லை. இதனால் அது பின்னர் கலைக்கப்பட்டது. ஆகவே, ராஜபட்சவை போர்க் குற்றவாளியாக்க சர்வதேச சமூகம் முன்வராவிட்டால், ஐக்கிய நாடுகள் சபைக்கும் சர்வதேச சங்கத்தின் கதியே ஏற்படும்.

அமெரிக்கா, இங்கிலாந்து போன்ற நாடுகள் ராஜபட்சவைக் கண்டிக்கும் நிலையில், காமன்வெல்த் மாநாட்டுக்குச் சென்ற இந்திய வெளியுறவுத் துறை அமைச்சரோ ராஜபட்சவை குனிந்து வணங்கியது சரியல்ல.

வரும் மார்ச்சில் ஜெனீவாவில் நடைபெறும் ஐக்கிய நாடுகள் சபை மனித உரிமை மாநாட்டில் இலங்கை அதிபர் ராஜபட்சவை சர்வதேசப் போர்க் குற்றவாளியாக அறிவித்து தீர்மானம் கொண்டுவர வேண்டும். ஆனால், இந்தியாவை மிகப் பெரும் சந்தையாக கருதுவதால், மேலை நாடுகள் இந்தியாவுக்கு எதிராகச் செயல்பட தயங்குகின்றன.

ஆகவே, ஈழத் தமிழர் படுகொலைக்குக் காரணமானவர்களை வரும் மக்களவைத் தேர்தலில் தோற்கடிப்பது அவசியம். அப்போதுதான் எதிர்காலத்தில் உலகத் தமிழர்களைப் பாதுகாக்க முடியும் என்றார்.

இந்த மாநாட்டில் பல்வேறு தீர்மானங்கள் நிறைவேற்றப்பட்டன.

மனித உரிமைக்கான குடிமக்கள் இயக்க மாநிலக் குழு உறுப்பினர் ஆ.மதுரைவீரன் தலைமை வகித்தார். மதிமுக மாநிலத் துணைப் பொதுச் செயலர் எ.மல்லை சத்யா, தமிழ்த் தேசிய விடுதலை இயக்கம் தியாகு, மக்கள் கூட்டமைப்பு சுகுமாரன் மற்றும் மீ.தா.பாண்டியன், மரண தண்டனைக்கெதிரான கூட்டமைப்பு அற்புதம்மாள், விடுதலைச் சிறுத்தைகள் ரவிக்குமார், மனித உரிமைக்கான மக்கள் இயக்க ஆலோசகர் ஹென்றி திபேன் மற்றும் மாநில அமைப்பாளர் இசக்கிமுத்து, கருப்பசாமி, வழக்குரைஞர் மீ.ப.மோகன், செல்வ மனோகரன் உள்ளிட்டோர் பேசினர். மனித உரிமை இயக்க ஜோஸ்பின் மேரி வரவேற்றார்.

மதிமுக மாநகர் செயலர் புதூர் மு.பூமிநாதன், மகபூப்ஜான், மனித உரிமைகள் இயக்க எம்.ஜே.பிரபாகர் உள்ளிட்டோர் கலந்து கொண்டனர்.                                      

செய்தி : தினமணி