.சிபிஎஸ்இ பள்ளிகளை இழுத்து மூடு

எப்படியோ ”கருணாநிதி-ஜெயலலிதா’” போராட்டம் என்று ஆக்கப்பட்டுவிட்ட சமச்சீர்க் கல்விப் பாடத்திட்டங்கள் பள்ளிகளில் போதிக்கப்படத் துவங்கிவிட்டன. ஆனால் பிரச்சினை முற்றாகத் தீரவில்லை. தீர்க்கும் எண்ணமும் யாரிடமும் இல்லை. மேலும் செய்யப்படவேண்டியது என்ன என்பது குறித்துத் திரட்டப்பட்ட கருத்துகளின் ஒரு பகுதி.

தமது பிள்ளைகளைப் 10ஆம் வகுப்பு வரை மெட்ரிக் பள்ளிகளில் படிக்க வைக்கும் பெற்றோர்களுக்கும் 11ஆம் வகுப்பு வந்ததும் இந்தத் தரம் பற்றிய நினைப்பே மறைந்து விடுவது எப்படி?

இது போதாதென்று தம் பிள்ளைகளை இன்னும் அதிமேதாவி ஆக்க வேண்டும் என்ற ஆசையில் மத்திய அரசின் சிபிஎஸ்இ பள்ளிகளில் படிக்க வைக்கும் பெற்றோர்கள், அவர்கள் 10ஆவது முடித்த பின்னர், மாநில வாரியப் பள்ளிகளில் கொண்டு போய்ச் சேர்க்கிறார்கள். ஏனென்று கேட்டால் அங்குதான் சிபிஎஸ்இ பள்ளிகளை விடக் கூடுதல் மதிப்பெண் வாங்க முடியும் என்று பதிலளிக்கின்றனர்.. மதிப்பெண் வந்தால் தரம் தேவையில்லை என்பது எந்த வகையில் நியாயம்?

தமிழ்நாட்டில், மத்தியஅரசு, சி.பி.எஸ்.இ. பாடத் திட்டத்தில் 27கேந்திரிய வித்யாலயா பள்ளிகளை நடத்துகின்றது.. சி.பி.எஸ்.இ. அங்கீகாரத்துடன்180தனியார் பள்ளிகளும் தமிழகத்தில் இயங்குகின்றன. இந்த ஆண்டு மேலும்30 பள்ளிகளுக்கும் அனுமதி கொடுக்கப்பட்டுள்ளது. வருங்காலத்தில் அனைத்து மெட்ரிகுலேஷன் பள்ளிகளுமே சிபிஎஸ்இ பள்ளிகளாகிவிடக் கூடும்...

பணக்காரர்கட்கு ஆங்கிலவழிக் கல்வி, ஏழையருக்கு தமிழ்வழிக்கல்வி என்பது எப்படி சமச்சீராகும்?

அரசுப்பள்ளிகளில் ஆங்கில வழிக்கல்வி முறையைக் கொண்டுவந்தவர் மறைந்த தமிழக முதல்வர் பக்தவத்சலம் ஆவார். மாநகராட்சிப் பள்ளிகளுக்கும் அதனை விரிவுபடுத்தியவர் ஸ்டாலின். அரசுப் பள்ளிகளில் ஆங்கிலவழியும் உண்டு என்று ஆக்கியதால் தமிழ்வழி இடங்கள் காலியாக உள்ளன.

எடுத்துக்காட்டாக அசோக்ந்கர் பெண்கள் மேனிலைப் பள்ளியில் ஆறாம் வகுப்புக்குத் தமிழ் வழிக்கல்விக்கு75பேரும், ஆங்கிலவழிக்கல்விக்கு299பேரும் சேர்ந்துள்ளனர். கோடம்பாக்கம் அரசு ஆண்கள் மேனிலைப்பள்ளீயில் தமிழ்வழியில்16பேரும், ஆங்கிலவழியில்145பேரும் சேர்ந்துள்ளதாகத் தக்வல்.

மத்திய அரசில் பணியாற்றும் அதிகாரிகளின் வாரிசுகளுக்காக ஏற்படுத்தப் பட்டவையே கேந்திரியா வித்யாலயா பள்ளிகள். ப்ல்வேறு மாநிலங்களுக்கு மாற்றப்பட்டாலும் கல்விகற்பதில் பாதிப்பு ஏற்படக் கூடாதென்பதே நோக்கம். இப்பள்ளிகளில் தமிழே படித்திடத் தேவை இல்லை.

இந்தியர்கள் எல்லோரும் சமமென்றால், அதிகாரிகளுக்குமட்டும் என்ன தனிச்சட்டம்? இன்று காலமும் மாறிவிட்டது. அனைத்துலக ரீதியில் குப்பனும் சுப்பனும் கூட வேலைக்குச் செல்ல முடிகின்றது. இந்தியர்கள் வெளிநாடு சென்று மேற்படிப்பினைத் தொடர சில தேர்வுகள் எல்லாம் எழுத வேண்டியுள்ளது. அதனால் அனைத்துலகத் தேவைகளை ஈடுகட்டுவதற்கு இணையான கல்வித் திட்டத்தையே கொண்டு வந்துவிடலாமே?

இண்டர்நேஷனல் ஸ்கூல் பாடத் திட்டப் பள்ளிகளும் தமிழகத்தில் இயங்குகின்றனவே? அவை யார் கட்டுப்பாட்டுக்குள் வருகின்றன?

இன்று நமக்குக் கிடைத்துள்ள இந்தப் பொதுப் பாடத் திட்டத்தையேனும் நாம் விடாது போராடி காப்பாற்றிக் கொள்ள வேண்டும், இந்தப் பொதுப் பாடத்திட்டம் முழுமையடைய சிபிஎஸ்இ பள்ளிகளை இழுத்து மூட வேண்டும். மாநிலக் கல்வி வாரியம், மெட்ரிக்குலேஷன், ஆங்கிலோ-இந்தியன், ஓரியண்டல் ஆகிய நான்கு வாரியங்களை நீக்கிட எந்த அறிவிப்பும் இன்றளவும் இல்லை. இந்த நான்கு வாரியங்களையும் ஒருங்கிணைத்து, ஒரே தமிழ்நாடு மாநிலப் பள்ளிக் கல்வி வாரியம் அமைக்கப்பட வேண்டும்

தாய்மொழிவழிக் கல்வியே தமிழன் தர உயரத் துண நிற்கும். மழலையர் பள்ளியிலிருந்து, பள்ளி இறுதிவரையேனும் தமிழே பயிற்று மொழி ஆக்கப்படல் வேண்டும். அதற்குக் கல்வியை மத்திய அரசிடமிருந்து மாநில அதிகார வரம்புக்குள் கொண்டு வரவேண்டும். அப்பொழுதுதான் சமச்சீர் கல்வி என்று சொல்ல முடியும் ?