தினத்தந்தி அதிபர் சிவந்தி ஆதித்தனார் மறைவு: முதல்வர் இரங்கல் !

தினத்தந்தி நாளிதழின் அதிபர் டாக்டர் சிவந்தி ஆதித்தன் அவர்கள் இன்று சென்னையில் காலமானார். அவர் மறைவுக்கு முதல்வர் ஜெயலலிதா இரங்கல் தெரிவித்துள்ளார்.

இதுகுறித்து அவர் வெளியிட்ட இரங்கல் செய்தியில் கூறியிருப்பதாவது:

தினத்தந்தி நாளிதழின் அதிபர் டாக்டர் சிவந்தி ஆதித்தன் அவர்கள் உடல்நலக் குறைவினால் மருத்துவமனையில் சிகிச்சை பெற்று வந்த நிலையில் இன்று (19.4.2013) இரவு சிகிச்சை பலனின்றி இயற்கை எய்தினார் என்ற செய்தி அறிந்து மிகுந்த துயரமும், மன வேதனையும் அடைந்தேன்.

தினத்தந்தி நாளிதழ் மூலம் தமிழகத்தில் பாமரரும் பத்திரிகை படிக்கும் பழக்கத்தை ஏற்படுத்தியவர் டாக்டர் சிவந்தி ஆதித்தன் அவர்கள்.  இவர் ஒரு சிறந்த விளையாட்டு வீரரும் ஆவார்.  இவர் எனது முந்தைய ஆட்சிக் காலத்தில் தமிழ்நாடு விளையாட்டு மேம்பாட்டு ஆணையத்தின் துணைத் தலைவராக திறம்பட பணியாற்றியது மிகவும் குறிப்பிடத்தக்கது. இவர் பத்மஸ்ரீ  விருது உள்ளிட்ட பல்வேறு விருதுகளுக்கு சொந்தக்காரர்.

எளிமையானவரும், பழகுவதற்கு இனிமையானவருமான டாக்டர் சிவந்தி ஆதித்தன் அவர்கள் மறைவு பத்திரிகைத்துறை  மற்றும் விளையாட்டுத் துறைக்கு  ஏற்பட்டுள்ள பேரிழப்பாகும்.

டாக்டர் சிவந்தி ஆதித்தன் அவர்களை இழந்து வாடும் அவரது குடும்பத்தினருக்கு எனது ஆழ்ந்த இரங்கலையும், அனுதாபத்தையும் தெரிவித்துக் கொள்வதுடன் அவரது ஆன்மா இறைவன் திருவடி நிழலில் இளைப்பாற எல்லாம் வல்ல இறைவனை வேண்டுகிறேன்.                                         

நன்றி :- தினத்தந்தி, 20-04-2013