ஆறு மொழிகளில் தயாராகும் ஏசு படத்தில் அனுஷ்கா!

தமிழ், ஆங்கிலம், பிரெஞ்சு உள்பட 6 மொழிகளில், சிங்கீதம் சீனிவாசராவ் இயக்கத்தில் உருவாகும் இயேசு பற்றிய படத்தில் நடிகை அனுஷ்கா முக்கிய வேடத்தில் நடிக்கிறார்.

தமிழில் கமலுடன் இணைந்து பல மறக்கமுடியாத படங்களைத் தந்தவர் தேசிய விருது பெற்ற இயக்குநரான சிங்கீதம் சீனிவாசராவ்.

ராஜபார்வை, அபூர்வ சகோதரர்கள், மைக்கேல் மதன காமராஜன், பேசும் படம் என இவர் இயக்கிய ஒவ்வொரு படமும் வசூல் மற்றும் பாராட்டுக்களைக் குவித்தவை.

சிங்கீதம் சீனிவாச ராவ் கடந்த 2008-ல் ‘கடோத்கஜ்’ என்ற அனிமேஷன் படத்தை இயக்கி அந்த படம் கான்ஸ் திரைப்பட விழாவில் திரையிடப்பட்டது குறிப்பிடத்தக்கது.

மூன்று வருட இடைவெளிக்குப் பிறகு, குழந்தைகளுக்கான ஒரு படத்தை அவர் இயக்குகிறார். இதில் அனுஷ்கா, நாகார்ஜுனா ஆகியோரும் நடிக்கிறார்கள்.

இயேசுவின் குழந்தைப் பருவத்தை மையப்படுத்தி உருவாகும் இப்படத்தில் ஒன்பது முதல் பதிமூன்று வயதுக்குட்பட்ட சிறுவர், சிறுமியர் நடிக்கின்றனர். இயேசு வாழ்ந்த அதாவது அவர் பயணப்பட்ட அந்தந்த இடங்களுக்கே சென்று படமாக்க இருக்கின்றார். படத்தின் பெயர் ‘பிரின்ஸஸ் ஆப் பீஸ்’. தமிழில் சமாதானத்தின் இளவரசன்.

குழந்தைகளை அறிமுகப்படுத்தும் காட்சிகளில் நாகார்ஜுனாவும், அனுஷ்காவும் நடிக்க உள்ளனர். தமிழ், தெலுங்கு, மலையாளம், இந்தி, ஆங்கிலம், பிரெஞ்சு ஆகிய ஆறு மொழிகளில் உருவாக இருக்கிறது.